Молитвослов Крестного хода

(Вы можете скачать данный молитвослов в формате PDF по ссылке)

Священник: Благослове́н Бог наш всегда́, ны́не и при́сно, и во ве́ки веко́в.

Хор и народ: Ами́нь.

Царю́ Небе́сный, /Уте́шителю, Ду́ше и́стины, /И́же везде́ сый /и вся исполня́яй,/ Сокро́вище благи́х/ и жи́зни Пода́телю, /прииди́ и всели́ся в ны́, /и очи́сти ны́ от вся́кия скве́рны, //и спаси́, Бла́же, ду́ши на́ша.

И Бог Господь:

глас 4.

Хор и народ: Бог Госпо́дь и яви́ся нам, благослове́н Гряды́й во и́мя Госпо́дне.

Стих 1: Испове́дайтеся Го́сподеви, я́ко благ, я́ко в век ми́лость Его́.

Стих 2: Обыше́дше обыдо́ша мя и и́менем Госпо́дним противля́хся им.

Стих 3: Не умру́, но жив бу́ду и пове́м дела́ Госпо́дня.

Стих 4: Ка́мень, его́же небрего́ша зи́ждущии, сей бысть во главу́ у́гла, от Го́спода бысть сей и есть ди́вен во очесе́х на́ших.

Тропарь, глас 4:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи, // Тя бо и еди́ну наде́жду и́мамы. Дважды.

Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты не бы предстоя́ла моля́щи, / кто бы нас избáвил от толи́ких бед; / кто же бы сохрани́л до ны́не свобо́дны; / не отсту́пим, Влады́чице, от Тебе́, // Твоя́ бо рабы́ спасáеши при́сно от вся́ких лю́тых.

Запевы. (священник - хор и народ)

Слава Тебе, Боже наш, слава Тебе!

Пресвятая Богородице, спаси нас!

Вси святии земли Московския, молите Бога о нас!

Хор и народ:  тропари, глас 6:

Поми́луй нас, Го́споди, поми́луй нас; / вся́каго бо отве́та недоуме́юще, / сию́ Ти моли́тву  я́ко Влады́це, //гре́шнии прино́сим: поми́луй нас.

Слава Отцу и Сыну и святому Духу/  Го́споди, поми́луй нас, / на Тя бо упова́хом; / не прогне́вайся на ны зело́, / ниже́ помяни́ беззако́ний на́ших, / но при́зри и ны́не я́ко благоутро́бен, / и изба́ви ны от враг на́ших; / Ты бо еси́ Бог наш, / и мы лю́дие Твои́, / вси дела́ руку́ Твое́ю, / /и и́мя Твое́ призыва́ем.

И ныне и присно и во веки веков Аминь/ Милосе́рдия две́ри отве́рзи нам, / благослове́нная Богоро́дице, / наде́ющиися на Тя да не поги́бнем, / но да изба́вимся Тобо́ю от бед: // Ты бо еси́ спасе́ние ро́да христиа́нскаго.

Таже диакон глаголет ектению:

Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Хор и народ: Го́споди, поми́луй (трижды).

Еще́ мо́лимся о Вели́ком Господи́не и отце́ на́шем Святе́йшем Патриа́рхе Кирилле и о всей во Христе́ бра́тии на́шей.

Хор и народ: Го́споди, поми́луй (трижды).

Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Хор и народ: Го́споди, поми́луй (трижды).

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии, благопоспеше́нии всех зде ныне предстоящих и молящихся.

Хор и народ: Го́споди, поми́луй (трижды).

Еще́ мо́лимся за всю бра́тию и за вся христиа́ны.

Хор и народ: Го́споди, поми́луй (трижды).

Возглас: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор и народ:  Ами́нь.

Хор и народ: Молитва ко Пресвятей Богородице.

Цари́це моя́ преблага́я,/ наде́ждо моя́ Богоро́дице/, прия́телище си́рых /и стра́нных предстáтельнице,/ скорбя́щих рáдосте,/ оби́димых покрови́тельнице́/ Зри́ши мою́ беду́,/ зри́ши мою́ скорбь,/ помози́ ми я́ко не́мощну,/ окорми́ мя я́ко стрáнна./ Оби́ду мою́ ве́си, /разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.

Глас 8

Досто́йно есть я́ко вои́стину / блажи́ти Тя, Богоро́дицу, Присноблаже́нную и Пренепоро́чную / и Ма́терь Бо́га на́шего. / Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу Тя велича́ем.

Священник: Моли́твами Святейшего Владыки нашего, Го́споди Иису́се Христе́, Бо́же наш, поми́луй нас.

Хор и народ: Ами́нь.

Молебственное пение Господу и Пресвятой Богородице

Священник: Слава Тебе Боже наш слава Тебе!

*(При повторении молебного пения следует начинать отсюда)

Хор и народ: Царю Небесный. Глас 6

Царю́ Небе́сный, /Уте́шителю, Ду́ше и́стины, /И́же везде́ сый /и вся исполня́яй,/ Сокро́вище благи́х/ и жи́зни Пода́телю, /прииди́ и всели́ся в ны́, /и очи́сти ны́ от вся́кия скве́рны, //и спаси́, Бла́же, ду́ши на́ша.

Хор и народ:

 Отче наш, Иже еси на небесе́х! Да святится имя Твое, да прии́дет Царствие Твое, да будет воля Твоя, яко на небеси́ и на земли́.
Хлеб наш насущный да́ждь нам дне́сь; и оста́ви нам до́лги наша, якоже и мы оставляем должнико́м нашим;и не введи нас во искушение, но изба́ви нас от лукаваго.

Хор и народ  Символ веры

¹Вéрую во еди́наго Бóга Отцá, Вседержи́теля, ^2/Творцá нéбу и земли́, ви́димым же всем и неви́димым. /³И во еди́наго Го́спода Иису́са Христа́, Сы́на Бо́жия,/ Единоро́днаго, И́же от Отца́ рожде́ннаго пре́жде всех век; /Све́та от Све́та, Бо́га и́стинна от Бо́га и́стинна, /рожде́нна, несотворе́нна, единосу́щна Отцу́, И́мже вся бы́ша. /Нас рáди человéк и нáшего рáди спасéния сшéдшаго с небéс/ и воплоти́вшагося от Ду́ха Свя́та и Мари́и Дéвы, и вочеловéчшася. ^4/Распя́таго же за ны при Понти́йстем Пилáте, /и страдáвша, и погребéнна. ⁵И воскрéсшаго в трéтий день по Писáнием./ ⁶И возшéдшаго на небесá, и седя́ща одесну́ю Отцá. /⁷И пáки гряду́щаго со слáвою суди́ти живы́м и мéртвым, Егóже Цáрствию не бу́дет концá./ ⁸И в Ду́ха Святáго, Гóспода, Животворя́щаго, И́же от Отцá исходя́щаго/, И́же со Отцéм и Сы́ном спокланя́ема и сслáвима, глагóлавшаго прорóки. /⁹Во еди́ну Святу́ю Собóрную и Апóстольскую Цéрковь. /¹⁰Исповéдую еди́но крещéние во оставлéние грехóв. /¹¹Чáю воскресéния мéртвых, /¹²и жи́зни бу́дущаго вéка. Ами́нь.

Тропарь Кресту Глас 1

Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.

Богородице Дево глас 4

Богоро́дице Де́во, ра́дуйся, благода́тная Мари́е, Госпо́дь с Тобо́ю, Благослове́нна Ты в жена́х и благослове́н Плод чре́ва Твоего́, я́ко Спа́са родила́ еси́ душ на́ших.

Тропарь Божией Матери пред иконой Ея «Смоленская»

Глас 4

К Богородице прилежно ныне притецем,/ грешнии и смиреннии, и припадем,/ в покаянии зовуще из глубины души:/ Владычице, помози, на ны милосердовавши,/ потщися, погибаем от множества прегрешений,/ не отврати Твоя рабы тщи,// Тя бо и едину надежду имамы

Тропарь Божией Матери пред иконой Ея «Владимирская»

Глас 4

Днесь светло красуется славнейший град Москва,/ яко зарю солнечную, восприемши, Владычице,/ чудотворную Твою икону,/ к нейже ныне мы притекающе и молящеся Тебе, взываем сице:/ о пречудная Владычице Богородице!/ Молися из Тебе воплощенному Христу Богу нашему,/ да избавит град сей и вся грады и страны христианския/ невредимы от всех навет вражиих// и спасет души наша, яко Милосерд.

Кондак глас 6

Предстaтельство христиан непостыдное, / ходaтайство ко Творцу непреложное, / не презри грешных молений глaсы, / но предвари, яко Благaя, на помощь нас, / верно зовущих Ти; / ускори на молитву, и потщися на умоление, / предстaтельствующи присно, Богородице, чтущих Тя.

Глас 6

Не и́мамы ины́я по́мощи, / не и́мамы ины́я наде́жды, / ра́зве Тебе́, Влады́чице. / Ты нам помози́, / на Тебе́ наде́емся, и Тобо́ю хва́лимся. // Твои́ бо есмы́ раби́, да не постыди́мся.

Молитва ко Пресвятой Богородице:

Цари́це моя́ Преблага́я, / Наде́ждо моя́, Богоро́дице, / Прия́телище си́рых / и стра́нных Предста́тельнице, / скорбя́щих Ра́досте, / оби́димых Покрови́тельнице! / Зри́ши мою́ беду́, / зри́ши мою́ скорбь; / помози́ ми, я́ко не́мощну, / окорми́ мя, я́ко стра́нна! / Оби́ду мою́ ве́си, / разреши́ ту, я́ко во́лиши: / яко не и́мам ины́я по́мощи, ра́зве Тебе́, / ни ины́я Предста́тельницы, / ни благи́я Уте́шительницы, / то́кмо Тебе́, о Богома́ти! / Я́ко да сохрани́ши мя / и покры́еши во ве́ки веко́в. Ами́нь.

Пресвятая Богородице, просвети мя светом Сына Твоего/ Аллилия, аллилуия, аллилуия.

Величание

Велича́ем Тя, /Пресвята́я Де́во, / Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния //всем, с ве́рою притека́ющим.

Молебственное пение святителям Московским

Тропарь Московских святых

Глас 4

Днесь проро́чество святи́теля Петра́/ пред оча́ми на́шими сбыва́ется,/ се́рдце бо Росси́и град Москва́/ свы́ше сла́ву ве́лию прие́млет,/ украша́емь, я́ко би́сером честны́м,/ мно́гим со́нмом Бо́жиих уго́дников,/ к ни́мже мы любо́вию возопии́м:/ о пречу́днии святи́телие, испове́дницы и му́ченицы но́вии,/ ца́рственнии страстоте́рпцы и благове́рнии кня́зие,/ преподо́бнии отцы́ и ма́тери,/ и прему́дрии юро́дивии,/ и вси святи́и, зна́емии и незна́емии,/ я́ко благоче́стия столпи́,/ моли́те Христа́ Бо́га// стране́ на́шей в ми́ре спасти́ся.

(Запевы начинает священство, повторяет Хор и народ)

Святителие московские, молите Бога о нас.

Молебные запевы мученикам.

Святии мученицы, молите Бога о нас.

Святый великомучениче и победоносче Георгие, моли Бога о нас.

Великомученик Георгий Победоносец

Святый великомучениче Димитрие, моли Бога о нас.

Святой Димитрий Солунский

Святии мученицы и исповедницы Михаиле и Феодоре, молите Бога о нас.

Михаил Всеволодович Черный, Черниговский, князь, чудотворец, мч.: †1245

Феодор Черниговский, мч., боярин мч. Михаила Черниговского: †1245

Святии Царственнии страстотерпцы, молите Бога о нас.

Николай Александрович, император Российский, страстотерпец: †1918

Священномучениче Иоа́нне, моли Бога о нас.

Иоанн Восторгов, прот., сщмч.: †1918

Священномучениче Алекса́ндре, моли Бога о нас.

Александр Хотовицкий, протопресвитер, сщмч.: †1937

Преподобномученицы Елисавето и Варваро, молите Бога о нас.

Елисавета Феодоровна, великая княгиня,  прмц.: †1918

Варвара (Яковлева), инокиня, прмц.: †1918

Молебные запевы благоверным князям, царям и княгиням Московским

Святый благове́рный кня́же Дании́ле, моли Бога о нас.

Даниил Московский, блгв. князь, сын св. Александра Невского: †1303

Святый благове́рный кня́же Дими́трие, моли Бога о нас.

Димитрий Донской, блгв. вел. князь Московский: †1389

Святый благове́рный царе́вичу Дими́трие, моли Бога о нас.

Димитрий Угличский и Московский, блгв. царевич: †1591

Преподобная княгине Ефроси́ние, моли Бога о нас.

Евдокия (в инокинях Евфросиния) Московская, великая княгиня, прп., супруга св. Димитрия Донского: †1407

Молебные запевы преподобным Московским

Преподобне отче наш Се́ргие, моли Бога о нас.

Сергий Радонежский, игумен, прп., всея России чудотворец: †1392 

Преподобнии Кири́лле и Мари́е, молите Бога о нас.

Кирилл Радонежский, схим., прп., отец прп. Сергия Радонежского: †нач. 40-х гг. XIV в.

Мария Радонежская, схимонахиня, прп., мать прп. Сергия Радонежского: †нач. 40-х гг. XIV 

Преподобне отцы Андре́е, моли Бога о нас.

Андрей Рублев, прп., иконописец: † 1430

Преподобне отче Макси́ме, моли Бога о нас.

Максим Грек, прп.: †1556

Преподобне отче Анато́лие, моли Бога о нас.

Анатолий, старец Оптинский (Потапов), иеросхим., прп.: †1922

Молебные запевы праведным и Христа ради юродивым и блаженным Московским

Святый праведный отче Алекси́е, моли Бога о нас.

Алексий Московский (Мечев), прот., прав.: †1923

Святый блаженный Васи́лие, моли Бога о нас.

Василий Московский, Христа ради юродивый, чудотворец:†1557 

Святая блаженная Матро́но, моли Бога о нас.

Матрона Московская (Никонова), блаженная: †1952

Величание московским святым

Хор и народ: Велича́ем вас,/ вси святи́и, в земли́ Моско́вской просия́вшии,/ и чтим святу́ю па́мять ва́шу,/ вы бо мо́лите о нас// Христа́ Бо́га на́шего.

Глас 8

Досто́йно есть я́ко вои́стину / блажи́ти Тя, Богоро́дицу, Присноблаже́нную и Пренепоро́чную / и Ма́терь Бо́га на́шего. / Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу Тя велича́ем.

Взбра́нной Воево́де победи́тельная, я́ко изба́вльшеся от злых, благода́рственная воспису́ем Ти раби́ Твои́ Богоро́дице: но я́ко иму́щая держа́ву непобеди́мую, от вся́ких нас бед свободи́, да зове́м Ти: Ра́дуйся Неве́сто Неневе́стная. 

Стихиры Пасхи, глас 5

Хор и народ: Да воскреснет Бог, / и расточатся врази Его.

Пасха / священная нам днесь показася; / Пасха нова святая; / Пасха таинственная; / Пасха всечестная. / Пасха Христос Избавитель; / Пасха непорочная; / Пасха великая; / Пасха верных. / Пасха двери райския нам отверзающая. / Пасха всех освящающая верных.

Яко исчезает дым, / да исчезнут.

Приидите / от видения жены благовестницы, / и Сиону рцыте: / приими / от нас радости благовещения, Воскресения Христова: / красуйся, ликуй / и радуйся, Иерусалиме, / Царя Христа узрев из гроба, / яко жениха происходяща.

Тако да погибнут грешницы от Лица Божия, / а праведницы да возвеселятся.

Мироносицы жены, / утру глубоку, / представша гробу Живодавца, / обретоша Ангела / на камени седяща, / и той провещав им, / сице глаголаше: / что ищете Живаго с мертвыми; / что плачете Нетленнаго во тли? / Шедше, проповедите учеником Его.

Сей день, егоже сотвори Господь, / возрадуемся и возвеселимся в онь.

Пасха красная, / Пасха, Господня Пасха! / Пасха всечестная / нам возсия. Пасха, / радостию друг друга обымем. / О Пасха! / Избавление скорби, / ибо из гроба днесь, / яко от чертога / возсияв Христос, / жены радости исполни, глаголя: /проповедите апостолом.

Слава Отцу и Сыну и Святому Духу и ныне и присно и во веки веков. Аминь.

Воскресения день, / и просветимся торжеством, / и друг друга обымем. / Рцем братие, / и ненавидящим нас, / простим вся Воскресением, / и тако возопиим: / Христос воскресе из мертвых, / смертию смерть поправ, / и сущим во гробех живот даровав.

Глас 6

Воскресение Христово видевше, / поклонимся Святому Господу Иисусу, / единому безгрешному, / Кресту Твоему покланяемся, Христе, / и святое Воскресение Твое поем и славим: / Ты бо еси Бог наш, / разве Тебе иного не знаем, / имя Твое именуем. / Приидите вси вернии, / поклонимся Святому Христову Воскресению: / се бо прииде Крестом радость всему миру. / Всегда благословяще Господа, / поем Воскресение Его: / распятие бо претерпев, / смертию смерть разруши.

Воскрес Иисус от гроба, / якоже прорече, / даде нам живот вечный / и велию милость.

Тропарь Пасхи

Христос воскресе из мертвых, / смертию смерть поправ, / и сущим во гробех живот даровав. 3 раза.

*Если шествие крестного хода не завершено, то необходимо вернуться к началу последования молебного пения.*